mire dil ki dhaḌak us ke tabassum par garan kyuun ho
main afsana huun us ka vo mira afsana-ḳhvan kyuun ho
mire kaam aa ga.i aḳhir miri kashana-bar-doshi
lapakti bijliyon ki zad pe mera ashiyan kyuun ho
kinaron se guzar jaana hi tufanon ki fitrat hai
jahan duniya Thahar jaa.e qadam mera vahan kyuun ho
tira jalva bhi jab tera hi parda hota jaata hai
to phir meri nigahon par nigahon ka guman kyuun ho
na main varafta-e-mutrib na main jan-dada-e-saqi
agar mahfil se uTh ja.un to mahfil bad-guman kyuun ho
main jis aalam men huun apni jagah ai ‘shor’ tanha huun
juda ho jis ki manzil vo rahin-e-karvan kyuun ho
Leave a Reply