vo miri jurat-e-kamyab se na-vaqif hain
haan vahi log jo girdab se na-vaqif hain
aisi raten ki jinhen niind ki lazzat na mili
aisi anhken jo abhi khvab se na-vaqif hain
meri kam-goi pe jo tanz kiya karte hain
meri kam-goi ke asbab se na-vaqif hain
un se kya kiije tavaqqoa vo hain nau-varid-e-dasht
dasht-e-vahshat ke jo adab se na-vaqif hain
vo jo be-gana-e-tahzib-o-tamaddun hain vo log
mahfilon ke adab-adab se na-vaqif hain
Leave a Reply