Arshad Mahmood Arshad
marte hue vajud ki hasrat tamam-shud
sanson se lipTi aḳhiri chahat tamam-shud
dast-e-qaza baḌha hai miri samt alvida.a
ai etikaf-e-ishq ibadat tamam-shud
saaqi tumhare madh-bhare honTon ka shukriya
bada-kashi ki saari halavat tamam-shud
TuuTi hai aaj saans ki Dori to yuun hua
an-dekhi manzilon ki masafat tamam-shud
bujhte hue charagh ki surat hava huun main
ik ḳhub-ru vajud ki taqat tamam-shud
ai bargah-e-husn koi faisla to kar
is na-murad-e-ishq ki hujjat tamam-shud
‘arshad’ mujhe to ghaib se aati hai ab sada
ibn-e-turab ab tiri mohlat tamam-shud
Leave a Reply