Har sans Mein Mismar khanDar TuTte Rahna

har saañs meñ mismār khañDar TūTte rahnā

sun sun ke shikastoñ kī ḳhabar TūTte rahnā

aflāk se mātam-zada āvāzoñ kī aamad

rah rah ke sitāroñ ke gajar TūTte rahnā

yalġhār havāoñ kī parindoñ kī safoñ par

āñdhī meñ parī-zādoñ ke par TūTte rahnā

din bhar vahī lamhāt se rahnā mutasādim

shab bhar vahī lamhoñ kī kamar TūTte rahnā

malbe pe savār āḳhirī fāteh kī tarah the

bachchoñ kā mire khel thā ghar TūTte rahnā

laḌkoñ kā alamiyyā ki maseñ tak nahīñ bhīgīñ

shāḳhoñ se sabhī kachche samar TūTte rahnā

Leave a Comment