vo jis ke dil men nihan dard do-jahan ka tha
ḳhabar kisi ko nahin kaun tha kahan ka tha
talash-e-yar men bhaTka kiye ḳhalaon men
hamen zamin ka pata tha na asman ka tha
hansa jo phuul to shabnam ki aankh bhar aa.i
bahar samjha jise daur vo ḳhizan ka tha
hazar baar mara zindagi men jite-ji
vo shaḳhs ḳhauf jise marg-e-na-gahan ka tha
vahin pe ja ke ruki aaj be-ḳhudi apni
jahan pe moḌ mohabbat ki dastan ka tha
bikherta hi raha nuur vo shab-e-gham men
jo mahtab tasavvur ke asman ka tha
vo jis ne raat dar-e-dil pe aa ke dastak di
zarur jhonka kisi yad-e-raftagan ka tha
tamam umr ki kavish se tai na ho paaya
vo ek fasla jo apne darmiyan ka tha
hua tha qatil sar-e-am jab mira yaaro
ajiib rang kuchh us vaqt asman ka tha
Leave a Reply