Kuchh Na Kuchh Ranj Wo De Jate Hain Aate Jate

kuchh na kuchh ranj vo de jaate hain aate jaate

chhod jaate hain shagufe koi jaate jaate

shauq ban ban ke mire dil men hain aate jaate

dard ban ban ke hain pahlu men samate jaate

khair se ghair ke ghar roz hain aate jaate

aur qasmen bhi mire sar ki hain khate jaate

haae milne se hai un ke mujhe jitna eraaz

vo usi darja nazar men hain samate jaate

nahin malum vahan dil men irada kya hai

vo jo is darja hain ikhlas badhate jaate

lo mire samne ghairon ke gile hote hain

lutf men bhi to mujhi ko hain satate jaate

aaj rukti hai mariz-e-gham-e-ulfat ko shifa

charagar dard bhi jaega to jaate jaate

yahi hamdam mujhe paigham-e-qaza dete hain

ye jo siine men dam-e-chand hain aate jaate

yuun hi akhir to hua naam aza ka badnam

aae the aa ke janaza bhi uthate jaate

Leave a Comment