Ameer Imam
un ko ḳhala men koi nazar aana chahiye
ankhon ko TuuTe ḳhvab ka harjana chahiye
vo kaam rah ke karna paḌa shahr men hamen
majnun ko jis ke vaste virana chahiye
is zaḳhm-e-dil pe aaj bhi surḳhi ko dekh kar
itra rahe hain ham hamen itrana chahiye
tanha.iyon pe apni nazar kar zara kabhi
ai bevaquf dil tujhe ghabrana chahiye
hai hijr to kabab na khane se kya usuul
gar ishq hai to kya hamen mar jaana chahiye
dana.iyan bhi ḳhuub hain lekin agar mile
dhoka hasin sa to use khana chahiye
biite dinon ki koi nishani to saath ho
jan-e-haya tumhen zara sharmana chahiye
is sha.iri men kuchh nahin naqqad ke liye
dildar chahiye koi divana chahiye
Leave a Reply