Khan Janbaz
tu samne hai par tiri ab bhi kami hai dost
dariya ke paas hote hue tishnagi hai dost
duniya se ja raha huun kisi ki talab liye
vaise ye zindagi baḌi achchhi kaTi hai dost
ye falsafe lapeT ke tum jeb men rakho
main ḳhuub janta huun mohabbat buri hai dost
ab to bata ki kya hai ye tere ḳhayal men
jitna main janta huun mohabbat yahi hai dost
aisa nahin ki aankh men aansu bache faqat
in ansuon ke saath men ik ḳhvab bhi hai dost
sach-much to koi toḌ ke laata nahin hai chand
ye sha.iri hai aur faqat sha.iri hai dost
paane ki zid na koi bichhaḌne ka ḳhauf hai
achchha hai tujh se ishq nahin dosti hai dost
Leave a Reply