Hasan Abbas Raza
shab ki shab mahfil men koi ḳhush-kalam aaya to kya
tyaag di jo bazm us men mera naam aaya to kya
zinat-e-qirtas jitne harf the dushman hue
ek tera ism zer-e-insiram aaya to kya
nargha-e-ada men ghirte hi badan ghirban tha
ab safa-e-yaran se koi be-niyam aaya to kya
kushtagan-e-shab ko pursa dene vaale ye bhi sun
ab tire lahje men rang-e-ehtaram aaya to kya
muntazir ankhen firaq-e-yar men pathra ga.iin
sub.h ka bhula palaT kar ghar jo shaam aaya to kya
dasht-e-ḳhvahish men ba-kar-e-said jab muddat ke ba.ad
ik ghazal-e-pa-burida zer-e-dam aaya to kya
Leave a Reply