hare patto sunahri dhuup ki qurbat men ḳhush rahna
magar mumkin nahin hai ek si halat men ḳhush rahna
magan rahte hain ye buḌhe shajar apni kathaon men
unhen aata hai apne zehn ki jannat men ḳhush rahna
ham insanon ko phir jiine ka maqsad hi nahin milta
likha hota jo us ne sab ki hi qismat men ḳhush rahna
ye aansu chaar din ke hain ye aansu suukh ja.enge
sikha denge tumhen halat har surat men ḳhush rahna
main apne zaḳhm akasr is liye bhi noch leta huun
kahin shamil na ho jaa.e miri aadat men ḳhush rahna
sukun-e-dil ganva baiThoge tum fitrat se laḌne men
jo chaho afiyat apne qad-o-qamat men ḳhush rahna
pukara umr ko ḳhushiyon ne jab masruf the behad
samay se siikh lete kaash ham fursat men ḳhush rahna
Leave a Reply