mire dagh-e-dil vo charagh hain nahin nisbaten jinhen shaam se
unhen tu hi aa ke bujha.ega ye jale hain tere hi naam se
main huun ek ashiq-e-be-nava tu navaz apne payam se
ye tiri raza pe tiri ḳhushi tu pukar le kisi naam se
main to gum huun teri talash men mujhe kaun jaane tire siva
koi kaise mahram-e-raz ho tiri ashiqi ke maqam se
tira ishq hai miri zindagi tira zikr hai miri bandagi
tujhe yaad karta huun main sada mujhe kaam hai isi kaam se
kabhi mai-kade pe jo dil raha tire ashiqon ki nazar paḌe
use kahiye bada-e-ma.arifat jo chhalak paḌe abhi jaam se
kahin uTh ke ja.un main kyuun ‘fana’ ki payam us ka mila mujhe
jo mila kabhi to milega vo mujhe dard-e-dil ke maqam se
Leave a Reply