‘rasa’ ko dil men rakhte hain ‘rasa’ ke janne vaale
vafa ki qadar karte hain vafa ke janne vaale
tiri tegh-e-ada khinchte hi apni jaan jaati hai
qaza se pahle marte hain qaza ke janne vaale
bhari hain shokhiyan lakhon tiri nichi nigahon men
hamin hain kuchh tiri sharm-o-haya ke janne vaale
miri fariyad sun kar kuchh unhen parva nahin hoti
niDar baithe hain ah-e-na-rasa ke janne vaale
‘rasa’ ko sab ne samjhaya magar samjha na kuchh zalim
hue majbur us mard-e-khuda ke janne vaale