phunk de hai munh tira har saf-dil ke tan men aag
samne ḳhurshid ke lagti hai jo darpan men aag
tujh se ai bulbul ziyada gul men hai tasir-e-ishq
dil men ḳhuun lab par hansi hai us ke pairahan men aag
ahl-e-zar saz-e-ra.unat se hovenge dozaḳhi
Dalte hain sham.a ki avval rag-e-gardan men aag
kohkan laala se ḳhuun tera hai joshan ba.ad saal
be-sutun ke dekh daa.em hai bhari daman men aag
soz-e-hijr-e-kanha se jo sanvla tha ‘uzlat’ aah
daghdar aḳhir lagi Tesu ke bindraban men aag
Leave a Reply