Un Ke Baghair Kaise Bhala Shab Basar Karen

un ke baghair kaise bhala shab basar karen

ḳhvabon men aa.en vo ki zara shab basar karen

parda uTha hijab uTha koi baat kar

so.e hue badan ko jaga shab basar karen

tu niind hai charagh hai tu dil ka chain hai

tere baghair kaise bhala shab basar karen

chup-chap ek dusre ko dekhte hain ham

ai chand koi baat bana shab basar karen

karti huun main bhi jism jalane ka faisla

tu bhi magar charagh bujha shab basar karen

jab zindagi azaab ki surat ho hijr men

is halat-e-ḳharab men kya shab basar karen

‘mahin’ kah raha hai mira yar-e-bevafa

dil ke diye ki lau ko baḌha shab basar karen

ik umr ho ga.i hai basar shab kiye hue

‘mahin’ ruTha yaar mana shab basar karen