ḳhuda hua na koi aur hi gavah hua
likha jo harf to hone ka ishtibah hua
navah-e-ishq talak khinchti ga.i ḳhushbu
ik aisa gul miri sanson pe iftitah hua
ye kya havas hai ki milta mujhe ziyada vo
mire liye to vo itna bhi be-panah hua
ajiib kiya hai ki tum se nahin nibhi meri
mira to ḳhud se bhi kam hi kabhi nibah hua
kabhi kabhi tire dil tak pahunch gaya mira dard
kabhi hua to yahi ishq men gunah hua
kisi bhi rang men khinchti na thi miri tasvir
main ban gaya koi kaghaz agar siyah hua
Leave a Reply