Mushtaq Naqvi
gulshan bhi saja.e hain is ne ye jhalka hai shamshir men bhi
insan ke lahu ka khel hua taḳhrib men bhi ta.amir men bhi
jo farq hai vo hai hathon ka jo shauq-e-amal men baḌhte hain
yuun ek hi naghma ek taḌap hai saaz men bhi shamshir men bhi
chun chun ke ḳhirad ne nocha hai phulon ki qabaon ko lekin
kuchh daman salim rah hi ga.e is sorish-dar-o-gir men bhi
ye sabr ki talqin aur TuuTe TuuTe jumle bahki satren
jo tum ne chhupana chaha tha vo chhup na saka tahrir men bhi
sab apni tarah se karte hain jiine ke jatan par kya kiije
tadbir nahin chalti aksar is kar-gah-e-tadbir men bhi
ye sadgi jo rangin bhi hai ye ḳhamushi jo taqrir bhi hai
vo ek tarah se lagte hain tahrir men bhi tasvir men bhi
Leave a Reply