Shahzad Ahmad
iblis bhi rakh lete hain jab naam farishte
main kyuun na kahun mujh se bhi hain ḳhaam farishte
vo nuur hain main ḳhaak huun lekin mire baa.is
lete nahin ik lamha bhi aram farishte
tanha.i men aa jaati hain huren mire ghar men
chamkate hain masjid ke dar-o-bam farishte
ik main hi to huun rat-ga.e jagne vaala
so jaate hain behosh sar-e-sham farishte
jannat se nikala hua insan vahi hai
shaitan bane baiThe hain nakam farishte
huun itna gunahgar ki allah ke aage
lete hue Darte hain mira naam farishte
duniya hui abad to mere hi sabab se
anjam na de paa.e koi kaam farishte
kya soch ke insan se sharma.e hue hain
dete nahin didar sar-e-am farishte
main ek gunahgar nasihat ka hadaf huun
duniya men bhi milte hain bahar-gam farishte
ye duḳhtar-e-raz dana-e-gandum to nahin hai
chakkhen to sahi bada-e-gulfam farishte
yuun ghaib se main DhunD ke laaya huun mazamin
jaise koi le aa.e tah-e-dam farishte
jo baat mire dil men thi aa.i hai zaban par
ab karte phirenge mujhe badnam farishte
‘shahzad’ zamana hua lekin miri janib
laate nahin allah ka paigham farishte
Leave a Reply