Ek Samundar Aansuon Ka Bhar Chuka Kamre Mein Wo

ek samundar āñsuoñ kā bhar chukā kamre meñ vo

apnī barbādī kā mātam kar chukā kamre meñ vo

uf ye sannāTā ye tārīkī ye tanhā.ī kā ḳhauf

tere bin jiite hī jī hai mar chukā kamre meñ vo

mujh ko kuchh aisā lagā ki mar ke zinda ho gayā

apne hī saa.e se jaise Dar chukā kamre meñ vo

ab na bolo aap kuchh aur nā hī ab bole koī

vo kabhī ka mar chukā hai mar chukā kamre meñ vo

uf re tanhā.ī kā ye ehsās apne aap meñ

laash jaise aap apnī dhar chukā kamre meñ vo

ḳhud-kushī ‘arpit’ kī koī zikr ke qābil nahīñ

jo bhī karnā thā use ab kar chukā kamre meñ vo

Leave a Comment