ek samundar ansuon ka bhar chuka kamre men vo
apni barbadi ka matam kar chuka kamre men vo
uf ye sannaTa ye tariki ye tanha.i ka ḳhauf
tere bin jiite hi ji hai mar chuka kamre men vo
mujh ko kuchh aisa laga ki mar ke zinda ho gaya
apne hi saa.e se jaise Dar chuka kamre men vo
ab na bolo aap kuchh aur na hi ab bole koi
vo kabhi ka mar chuka hai mar chuka kamre men vo
uf re tanha.i ka ye ehsas apne aap men
laash jaise aap apni dhar chuka kamre men vo
ḳhud-kushi ‘arpit’ ki koi zikr ke qabil nahin
jo bhi karna tha use ab kar chuka kamre men vo
Leave a Reply