Bharat Bhushan Pant
ek na.e sanche men Dhal jaata huun main
qatra qatra roz pighal jaata huun main
jab se vo ik suraj mujh men Duuba hai
ḳhud ko bhi chhu luun to jal jaata huun main
a.ina bhi hairani men Duuba hai
itna kaise roz badal jaata huun main
miThi miThi baton men ma.alum nahin
jaane kitna zahr ugal jaata huun main
ab Thokar khane ka mujh ko ḳhauf nahin
girta huun to aur sambhal jaata huun main
akasr ab apna pichha karte karte
ḳhud se kitni duur nikal jaata huun main
Leave a Reply