sar ko nausha ke mire shaah ne bandha sehra
sura-e-nur ka dikhlata hai jalva sehra
riish yaqub ne rakkhi hai ruḳh-e-yusuf par
chashm-e-bad-dur ki hai zulf-e-zuleḳha sehra
bagh-e-ulfat se hasinon ne jo kaliyan biini
us pari ke liye pariyon ne banaya sehra
jadvalen sone ki yaqut raqam ne khinchi
ya hai mus.haf pe sar-e-lauh mutalla sehra
jalva-e-tur ka muusi ko guman ho jaata
mere nausha jo zara dekhte sar ka sahra
sho.ala-e-husn jo un ka na chhupa sehre men
ijz se aap ko qadmon pe giraya sehra
pote paḌpoton ke tum bandhiyo sar ko sehre
jaisa baaba ne tumhare tumhen bandha sehra
hub ka ta.aviz bane phuul har ik sehre ka
vasl-e-yar us ko ho jis ne tira dekha sehra
uftada bhi hai ye aur baḌa shoḳh bhi hai
gul-e-ruḳhsar ka le leta hai bosa sehra
sehra jo bandhte hain hind men naushahon ko
chashm-e-bad ke liye shayad hai ye nikla sehra
panja-e-mehr se zohra ne bala.en le liin
jab ‘nasim’-e-chaman-e-shauq ne likkha sehra
Leave a Reply