ḳhushk palkon ko tire dar pe bhigone aaya
ek muddat se jo roya na tha rone aaya
janta huun ki nikalna hai yahan se mushkil
aaj ankhon men tiri ḳhud ko main khone aaya
jis ke papon ke liye laakh samundar kam hain
ek dariya men gunahon ko vo dhone aaya
zindagi men jo sukun se na kabhi sota tha
oḌh kar aaj kafan qabr men sone aaya
chhup ke karta hai daraḳhton ke lahu ka sauda
aap ke samne paudon ko jo bone aaya
Leave a Reply