Poet
ab dil bhi dukhao to aziyyat nahin hoti
hairat hai kisi baat pe hairat nahin hoti
ab dard bhi ik had se guzarne nahin paata
ab hijr men vo pahli si vahshat nahin hoti
hota hai to bas ek tire hijr ka shikva
varna to hamen koi shikayat nahin hoti
kar deta hai be-saḳhta banhon ko kushada
jab bach ke nikal jaane ki surat nahin hoti
dil ḳhush jo nahin rahta to is ka bhi sabab hai
maujud koi vaj.h-e-masarrat nahin hoti
yuun bar-sar-e-paikar huun main ḳhud se musalsal
ab us se ulajhne ki bhi fursat nahin hoti
ab yuun bhi nahin hai ki vo achchha nahin lagta
yuun hai ki mulaqat ki surat nahin hoti
ye hijr-e-musalsal ka vazifa hai miri jaan
ik tark-e-sukunat hi to hijrat nahin hoti
do chaar baras jitne bhi hain jabr hi sah len
is umr men ab ham se baghavat nahin hoti
Leave a Reply