ainuddin-azim

Sataish Na Kijiye Tabrra Sahi

sataish na kijiye tabrra sahi

nahin bint-e-angur Tharra sahi

ta.assur nahin un ke ruḳh par na ho

hai qur.an to qur.an muarra sahi

magar kitne suraj hain dushman mire

miri haisiyat ek zarra sahi

kahan chain tere junun-kar ko

gham-e-do-jahan se mubarra sahi

badan dar badan ishq ruh-e-ravan

zaman dar zaman ek dharra sahi

ra.unat gharibi ka mahsul hai

sukhi ko saḳhavat ka gharra sahi

piyenge yunhi hans ke ham zahr-e-gham

hamare liye roz-marra sahi

mila kuchh to qatil se ‘azim’ tumhen

pas-e-dagh-e-dil ek chharra sahi

More Poems

Leave a Comment