Rahman Hafeez
uḌate aa.e hain aap apne ḳhvab-zar ki ḳhaak
ye aur ḳhaak hai ik dasht-e-be-kanar ki ḳhaak
ye main nahin huun to phir kis ki aamad aamad hai
ḳhushi se nachti phirti hai regzar ki ḳhaak
hamen bhi ek hi sahra diya gaya tha magar
uḌa ke aa.e hain vahshat men be-shumar ki ḳhaak
hamin muqim hue muddaten huiin lekin
suron se ab bhi nikalti hai rahguzar ki ḳhaak
ye haal hai ki abhi se khanak rahe hain zaruf
abhi gundhi nahin jin men se be-shumar ki ḳhaak
suna hai DhunDte phirte hain kab se kuza-garan
hamari aankh ka paani tire dayar ki ḳhaak
ajab nahin ki mujhe zinda gaḌne vaale
kal aa ke phank rahe hon mire mazar ki ḳhaak
Leave a Reply