gham ka guman yaqin-e-tarab se badal gaya
ehsas-e-ishq husn ke sanche men Dhal gaya
saath un ke le raha huun main gul-gasht ke maze
ye ḳhvab hi sahi mira ji to bahal gaya
majbur-e-ishq chashm-e-fusun-saz se huun main
jaadu mujhi pe dost ka chalna tha chal gaya
main intizar-e-eid men tha eid aa ga.i
arman-e-did daman-e-ishrat men pal gaya
hai barq-e-jalva yaad magar ye nahin hai yaad
ḳhirman mire ghurur ka kis vaqt jal gaya
paiman-e-ishq-o-husn ki tajdid ke siva
jo bhi ḳhayal zehn men aaya nikal gaya
baḌhte chale hain aa.e din asbab-e-iztirab
yadash-ba-ḳhair aaj ka va.ada bhi Tal gaya
‘manzur’ kis zaban se buton ko bura kahen
iman hamara kufr ke daman men pal gaya
Leave a Reply