In Ilm-O-Agahi Ki Kitabon Mein Kuchh Nahin

Poet

in ilm-o-agahi ki kitabon men kuchh nahin

kya DhunDhta hai yaar nisabon men kuchh nahin

ḳhushbu ko DhunDne ki tamanna hai kis liye

kuchh aur dekh sukhe gulabon men kuchh nahin

jab apne paas pyaar ki surat nahin rahi

chhoḌo ḳhayal-e-dost ki ḳhvabon men kuchh nahin

vo shahr miT chuka jo basaya tha pyaar ka

kya DhunDte ho yaar ḳharabon men kuchh nahin

ho aankh men surur to kya mai-kade se kaam

saghar men kuchh nahin hai sharabon men kuchh nahin