yuun be-dam hain sansen ghuTan kuchh nahin hai
kisi dard ki ab chubhan kuchh nahin hai
khilaune hain miTTi ke ham sab yahan par
haqiqat yahi hai badan kuchh nahin hai
ye maana ki paikar bahut kuchh hai lekin
bina ruuh ye pairahan kuchh nahin hai
lagi aag ḳhvabon men itni ki samjho
ye ankhon ki mere jalan kuchh nahin hai
main ḳhud mustaqil huun safar men so mujh ko
ye lagne laga hai thakan kuchh nahin hai
bina saath tere sabhi kuchh hai suuna
ye duniya jahan anjuman kuchh nahin hai
numa.ish hai sab ‘mit’ mere ghamon ki
ghazal kuchh nahin hai suḳhan kuchh nahin hai
Leave a Reply