Meri Be-KHudi Hai Wo Be-KHudi Ki KHudi Ka Wahm-O-Guman Nahin

Chakbast Brij Narayan

miri be-ḳhudi hai vo be-ḳhudi ki ḳhudi ka vahm-o-guman nahin

ye surur-e-saghar-e-mai nahin ye ḳhumar-e-ḳhvab-e-giran nahin

jo zuhur-e-alam-e-zat hai ye faqat hujum-e-sifat hai

hai jahan ka aur vajud kya jo tilism-e-vahm-o-guman nahin

ye hayat alam-e-ḳhvab hai na gunah hai na savab hai

vahi kufr-o-din men ḳharab hai jise ilm-e-raz-e-jahan nahin

na vo ḳhum men baade ka josh hai na vo husn jalva-farosh hai

na kisi ko raat ka hosh hai vo sahar ki shab ka guman nahin

vo zamin pe jin ka tha dabdaba ki buland arsh pe naam tha

unhen yuun falak ne miTa diya ki mazar tak ka nishan nahin