jahan kuchh dard ka mazkur hoga
hamara sher bhi mashhur hoga
jahan men husn par do din ke ai gul
koi tujh sa bhi kam maghrur hoga
padenge yuun hi sang-e-tafraqa gar
to ik din shisha-e-dil chuur hoga
mujhe kal khak-afshan dekh bola
yahi ushshaq ka dastur hoga
hua huun marg ke nazdik gham se
khuda jaane ye kis din duur hoga
vahi samjhega mere zakhm-e-dil ko
jigar par jis ke ik nasur hoga
hamen paimana tab ye dega saaqi
ki jam-e-umr jab maamur hoga
jo yuun gham nish-zan har dam rahega
to phir dil khana-e-zambur hoga
yahi rona hai gar manzur ‘jurat’
to binai se tu maazur hoga
Leave a Reply