Saneha Ye Bhi Ek Roz Kar Jaunga

sāneha ye bhī ik roz kar jā.ūñgā

vaqt kī pālkī se utar jā.ūñgā

apne TuuTe hue ḳhvāb kī kirchiyāñ

terī āsūda āñkhoñ meñ bhar jā.ūñgā

raushnī ke safīne bulāte raheñ

sāhil-e-shab se ho kar guzar jā.ūñgā

ajnabī vādiyāñ koī manzil na ghar

rāste meñ kahīñ bhī utar jā.ūñgā

mere dushman ke dil meñ jo barsoñ se hai

vo ḳhalā bhī maiñ ik roz bhar jā.ūñgā

dostoñ se mulāqāt kī shaam hai

ye sazā kaaT kar apne ghar jā.ūñgā

Leave a Comment