Raheel Farooq
tang naddi ke taḌapte hue paani ki tarah
ham ne Daali hai na.i ek ravani ki tarah
Dhalte Dhalte bhi ghazab Dhaa.e gaya hijr ka din
kisi kafir ki junun-ḳhez javani ki tarah
aisi vahshat ka bura ho ki ham apne ghar se
gham hue ḳhud bhi mohabbat ki nishani ki tarah
nange sach qabil-e-bardasht kahan hote hain
vaqi.a kahiye to kahiyega kahani ki tarah
paas rakkhen to malal aag laga.en to malal
dil bhi hai kya kisi tasvir purani ki tarah
ishq hai madrasa-e-zist ki ukhḌi hui iinT
hama-dani ki tarah hech-mudani ki tarah
ye ghazal hazrat-e-‘rahil’ ki hai dhyan rahe
aap poshida hain lafzon men ma.ani ki tarah
Leave a Reply