kya zindagi ne rakkhi saughat mere haq men
har jiit us ko hasil har maat mere haq men
taqsim ho gaya hai donon men ek rahbar
ik haath us ke hisse ik haat mere haq men
muddat se nam hai daman aḳhir dikha.en kis ko
ik roz ho ga.i thi barsat mere haq men
hain raunaqen kahin to bedariyan kahin hain
jo raat us ke haq men vo raat mere haq men
yuun mushtarak the ham sab har fard tha masavi
phir bhi hain saare mushkil halat mere haq men
kya ḳhuub hai tumhara ye mansab-e-saḳhavat
sab iltifat ḳhud par zulmat mere haq men
lazim hai naghmagi bhi goya.i bhi zaruri
likhti hai ab ḳhamoshi naghmat mere haq men
Leave a Reply