Nuzhat Abbasi
mauj-e-dariya ke labon par tishnagi hai karbala
reg-e-sahil par taḌapti zindagi hai karbala
sabr ki aur zabt ki ye manzilen hain aḳhiri
azm ahl-e-bait ka kya dekhti hai karbala
haq kabhi jhukta nahin hai sar bhi kaT jaa.e agar
zehn-o-dil ke vaste ik agahi hai karbala
kyuun sakina aur zainab is qadar ḳhamosh hain
duur tak sahra men dekho ḳhamushi hai karbala
miT gaya hai farq sab farda men aur diroz men
maat de kar raḳhsh-e-dauran ko chali hai karbala
ta-qayamat zikr se raushan rahegi ye zamin
zulmaton ki shaam men ik raushni hai karbala
ai gham-e-sham-e-ghariban ai shab-e-tar-e-alam
ahl-e-dil ko roz-o-shab taḌpa rahi hai karbala
Leave a Reply