Syed Sarosh Asif
ik tamasha ham anokha dekhte
ḳhud ko hansta sab ko rota dekhte
sar se pa tak us ko puura dekhte
ḳhud ko jab aadha adhura dekhte
ḳhud tamasha ban ga.e duniya men ham
varna duniya ka tamasha dekhte
kyuun bhala ghar lauTte ham dasht se
kyuun bhala dekha-dikhaya dekhte
vus.aten milti agar bina.i ko
dasht se ghar ghar se sahra dekhte
pusht par bauchhar tiron ki hui
varna ham qatil ka chehra dekhte
kaash ho jaate kisi mele men gum
aur phir ji bhar ke mela dekhte
ek hi thi zindagi sayyad ‘sarosh’
kuchh to kar ke ulTa sidha dekhte
Leave a Reply