Arshad Mahmood Arshad
kahin to phenk hi denge ye baar sanson ka
uTha.e bojh jo phirte hain yaar sanson ka
ana ghurur takabbur hayat kuchh bhi nahin
ki saara khel hai pyare ye chaar sanson ka
chalo ye zindagi zinda-dili se jiite hain
baḌhega is tarah kuchh to vaqar sanson ka
gulabi honT vo honTon pe rakh ke kahti thi
sada rahega ye tujh par ḳhumar sanson ka
baḌe qarib se guzri hai maut chhu ke tujhe
jo ho sake koi sadqa utaar sanson ka
hava ye vajd men aa kar diye se kahne lagi
ki ab tu sah nahin pa.ega vaar sanson ka
ham is ko zindagi samjhen to kis tarah ‘arshad’
kisi ke haath men hai iḳhtiyar sanson ka
Leave a Reply