ai javanan-e-vatan ruuh javan hai to utho
aankh us mahshar-e-nau ki nigaran hai to utho
khauf-e-be-hurmati-o-fikr-e-ziyan hai to utho
pas-e-namus-e-nigran-e-jahan hai to utho
utho naqqara-e-aflak baja do uth kar
ek soe hue aalam ko jaga do uth kar
ek ik samt se shab-khun ki tayyari hai
lutf ka vaada hai aur mashq-e-jafa-kari hai
mahfil-e-zist pe farman-e-qaza jaari hai
shahr to shahr hai gaanv pe bhi bambari hai
ye faza men jo garajte hue tayyare hain
barsar-e-dosh-e-hava maut ke harkare hain
is taraf hathon men shamshiren hi shamshiren hain
us taraf zehn men tadbiren hi tadbiren hain
zulm par zulm hain taziron pe taaziren hain
sar pe talvar hai aur paanv men zanjiren hain
ek ho ek ki hangama-e-mahshar hai yahi
arsa-e-zist ka hangama-e-akbar hai yahi
apni sarhad pe jo aghyar chale aate hain
shoala-afshan o sharar-bar chale aate hain
khuun piite hue sarshar chale aate hain
tum jo uth jaao to be-kar chale aate hain
khuun jo bah nikla hai us khuun men baha do un ko
un ki khodi hui khandaq men gira do un ko
rang-e-gul-ha-e-gulistan-e-vatan tum se hai
sorish-e-naara-e-rindan-e-vatan tum se hai
nashsha-e-nargis-e-khuban-e-vatan tum se hai
iffat-e-mah-e-jabinan-e-vatan tum se hai
tum ho ghairat ke amiin tum ho sharafat ke amiin
aur ye khatre men hain ehsas tumhen hai ki nahin
ye darinde ye sharafat ke purane dushman
tum ki ho hamil-e-adab-o-rivayat-e-kuhan
jada-paima ke liye khizr ho tum ye rahzan
tum ho khirman ke nigahban ye barq-e-khirman
khitta-e-pak men zinhar na aane paaen
aa hi jaaen jo ye zinda to na jaane paaen
mard-o-zan pir-o-javan in ke mazalim ke shikar
khun-e-maasum men duubi hui in ki talvar
ye qayamat ke havasnak ghazab ke khun-khar
in ke isyan ki na had hai na jaraem ka shumar
ye tarahhum se na dekhenge kisi ki janib
in ki topon ke dahan kar do unhi ki janib
ye to hain fitna-e-bedar daba do in ko
ye mita denge tamaddun ko mita do in ko
phunk do in ko jhulas do ki jila do in ko
shan-e-shayan-e-vatan ho ye bata do in ko
yaad hai tum ko kin aslaf ki tum yaden ho
tum to khalid ke pisar bhiim ki auladen ho
tum to tanha bhi nahin ho kai dam-saz bhi hain
ruus ke mard bhi hain chiin ke jan-baz bhi hain
kuchh na kuchh saath farangi ke fusun-saz bhi hain
aur ham jaise bahut zamzama-pardaz bhi hain
duur insan ke sar se ye musibat kar do
aag dozakh ki bujha do ise jannat kar do
Leave a Reply