Jahangeer Nayab
harf se tasir lafzon se ma.ani le gaya
jaate jaate vo miri jadu-bayani le gaya
us se thiin mansub jo yaden suhani le gaya
chhin kar mujh se sabhi apni nishani le gaya
shah-rah-e-zist par mujh ko akela chhoḌ kar
jaane vaala mujh se lutf-e-zindagani le gaya
mez par nanha sa ik kaghaz ka TukḌa chhoḌ kar
zindagi ki har ḳhushi vo na-gahani le gaya
ham udhar masruf the aur vaqt ka sail-e-ravan
kya pata kab chhin kar ham se javani le gaya
muddaton se sakit-o-jamid hai ye nayab dil
kaun is dariya ki maujon ki ravani le gaya
Leave a Reply