saleem-kausar

Dast-E-Dua Ko Kasa-E-Sail Samajhte Ho

dast-e-dua ko kasa-e-sail samajhte ho

tum dost ho to kyuun nahin mushkil samajhte ho

siine pe haath rakh ke batao mujhe ki tum

jo kuchh dhadak raha hai use dil samajhte ho

har shai ko tum ne farz kiya aur is ke baad

saae ko apna madd-e-muqabil samajhte ho

dariya tumhen sarab dikhai diya aur ab

gard-o-gubar-e-rah ko manzil samajhte ho

khush-fahmiyon ki had hai ki paani men ret par

jo bhi jagah mile use sahil samajhte ho

tanhai jalva-gah-e-tahayyur hai aur tum

viraniyon ke raqs ko mahfil samajhte ho

jis ne tumhari niind pe pahre bitha diye

apni taraf se tum use ghafil samajhte ho

More Poems

Leave a Comment