ye raste men jo shab khaḌi hai haTa raha huun muaaf karna
baghair ijazat main din ko basti men la raha huun muaaf karna
zamin banjar thi tum se pahle pahaḌ ḳhamosh dasht ḳhali
kahaniyo men tumhen kahani suna raha huun muaaf karna
kuchh itne kal jam.a ho ga.e hain ki aaj kam paḌta ja raha hai
main in parindon ko apni chhat se uḌa raha huun muaaf karna
ye be-yaqini ajab nasha hai ye be-nishani ajab sakun hai
main in andheron ko raushni se bacha raha huun muaaf karna
inhen sitaron ke sab lata.if suna chuka huun hansi hansi men
aur ab charaghon se apna daman bacha raha huun muaaf karna
mujhe batane ka fa.eda kya makin kya the makan kya hain
main us gali se na aa raha huun na ja raha huun muaaf karna
Leave a Reply