Ye Raste Mein Jo Shab khaDi Hai haTa Raha Hun Muaf Karna

ye rāste meñ jo shab khaḌī hai haTā rahā huuñ muaaf karnā

baġhair ijāzat maiñ din ko bastī meñ lā rahā huuñ muaaf karnā

zamīn banjar thī tum se pahle pahāḌ ḳhāmosh dasht ḳhālī

kahāniyo meñ tumheñ kahānī sunā rahā huuñ muaaf karnā

kuchh itne kal jam.a ho ga.e haiñ ki aaj kam paḌtā jā rahā hai

maiñ in parindoñ ko apnī chhat se uḌā rahā huuñ muaaf karnā

ye be-yaqīnī ajab nasha hai ye be-nishānī ajab sakūñ hai

maiñ in añdheroñ ko raushnī se bachā rahā huuñ muaaf karnā

inheñ sitāroñ ke sab latā.if sunā chukā huuñ hañsī hañsī meñ

aur ab charāġhoñ se apnā dāman bachā rahā huuñ muaaf karnā

mujhe batāne kā fā.eda kyā makīn kyā the makān kyā haiñ

maiñ us galī se na aa rahā huuñ na jā rahā huuñ muaaf karnā

Leave a Comment