junun ḳhatm hua e’tidal rah gaya hai
biphar raha tha jo dariya niDhal rah gaya hai
jise dua ke sahare pe ibtida kiya tha
guzar gaya hai vo mausam vo saal rah gaya hai
tumhare sard ravayye se saaf zahir hai
hamara kuchh to ta.alluq bahal rah gaya hai
jhaTak ke haath chala hai baḌi hi ujlat men
zara Thahar ki zaruri saval rah gaya hai
ki dil men Tiis bhi uThti hai der der ke baad
tira ḳhayal bhi ab ḳhal-ḳhal rah gaya hai
gaya hai jo bhi use raund kar gaya aḳhir
ye bagh-e-ḳhvab-numa pa.emal rah gaya hai
charagh-e-hijr se ubhri hai ik dhuen ki lakir
so dard bujh gaya hai aur malal rah gaya hai
Leave a Reply