Sohail Akhtar
dast-bardar hua main bhi talabgari se
ab kahin ja ke ifaqa hua bimari se
ḳhaak men ḳhud ko milaya to jaḌen paa.i hain
kaise rokega koi mujh ko numudari se
TuuT hi jaate hain iḳhlas ke putle aḳhir
so mujhe bach ke nikalna hai adakari se
ab bhi kuchh chizen hain bazar men jo aa.i nahin
ab bhi munkir hai koi meri ḳharidari se
ham akahre kabhi bar-vaqt samajh paate nahin
kaam kar jaata hai chup-chap vo tahdari se
dil-e-nadan ulaT deta hai akasr ye bisat
aql yuun chaal bahut chalti hai ayyari se
jab achanak hi har ik faisla hona hai yahan
mujh ko bhi koi ilaqa nahin tayyari se
saḳht-jani ke mile kitne hi e.azaz mujhe
aur milta bhi kya ummid ki be-zari se
jalta uupar se huun andar se nikharta huun ‘suhail’
ḳhud ko yuun aag lagata huun main fankari se
Leave a Reply