Ejaz Gul
pechak-e-umr apne sanvar aa.ine ke saath
baaqi ke chaar din bhi guzar aa.ine ke saath
hasid bahut hai pal men huvaida kare ḳhizan
itna na lag ke baiTh bahar aa.ine ke saath
pathra ga.e hain log tajalli se husn ki
thoḌa sa Daal ruḳh pe ghubar aa.ine ke saath
karta hai aks zer-o-zabar na-murad vaqt
jab ghumta hai ulTe madar aa.ine ke saath
paaya na kuchh ḳhala ke siva aks-e-hairati
guzra tha ar-par hazar aa.ine ke saath
ma.adum ho rahe hain ḳhad-o-ḳhal kis sabab
guft-o-shunid kar mire yaar aa.ine ke saath
viran sa khanDar hai magar sair ke liye
lagti hai ik tavil qatar aa.ine ke saath
ma.akus o aks kaise hain paivast dekh tu
a.ina kar raha hai singhar aa.ine ke saath
Leave a Reply