Pech De Zulf-E-Ambarin Na Kahin

pech de zulf-e-ambarin na kahin

khud ulajh jaao ai hasin na kahin

kabhi ghabrate hain to kahte hain

koi betab hai kahin na kahin

bahut israr vasl par nahin khuub

munh se kah den vo phir nahin na kahin

zikr jis ghamzade ka hota hai

dil ye kahta hai hon hamin na kahin

sajde karte hain log der men bhi

vaan bhi ai yaar hon hamin na kahin

naaz uthata hai nazninon ke

dil bhi ho jaae naznin na kahin

sunte hain arsh hai rafia bahut

koi janan ki ho zamin na kahin

kah rahi hai fasurdagi un ki

mar gaya hai koi kahin na kahin

dil mira le gae to hain khush khush

hon jo meri tarah hazin na kahin

asman jis ko log kahte hain

koi qatil ki ho zamin na kahin

muztarib be-sabab nahin ‘zeba’

dil laga hai magar kahin na kahin

Leave a Comment