Bharat Bhushan Pant
main kya bata.un kaisi pareshaniyon men huun
kaghaz ki ek naav huun aur paniyon men huun
chehre ke ḳhadd-o-ḳhal men mahdud main nahin
ik aa.ina huun apni hi hairaniyon men huun
dushvariyon ko Thiik se samjha nahin abhi
mushkil miri yahi hai ki asaniyon men huun
maujon se duur rah ke bhi badla nahin nasib
sahil ke as-pas bhi tughyaniyon men huun
mujh tak hi lauT aati hai meri sada ki guunj
ik bazgasht sa kahin viraniyon men huun
oḌha hua hai main ne ye kaisa ajab libas
itna Dhaka hua huun ki uryaniyon men huun
raḳht-e-safar men kijiye mera shumar bhi
shamil main apni be-sar-o-samaniyon men huun
Leave a Reply