Neeraj Goswami
zaban par sabhi ki baat hai faqat savar ki
kabhi to baat bhi ho palki liye kahar ki
gulon ko titliyon ko kis tarah karega yaad vo
ki jis ko fikr rat-din lagi ho rozgar ki
bigaḌ ke jis ne pa liya tamam lutf-e-zindagi
nahin sunega phir vo baat koi bhi sudhar ki
vo ḳhush rahe ye soch kar sada main harta gaya
kisi ke saath jab laḌi laḌa.i ar-par ki
jise bhi dekhiye use vo toḌ kar hi hai baḌha
kahan rahin hain desh men zaruraten qatar ki
tujhe paḌha hamesha main ne apni band ankhon se
ye dastan hai nazar pe raushni ke vaar ki
chaḌhe jo is qadar ki phir kabhi utar nahin sake
talash zindagi men hai mujhe usi ḳhumar ki
Leave a Reply