yaqin-o-ilm ki faza na shahr men na gaanv men
kisi ka koi mudda.a na shahr men na gaanv men
samajh sake jo raste men gardishon ki chaal ko
koi bhi aisa rahnuma na shahr men na gaanv men
sisak rahi hain izzaten uchhal rahi hain pagḌiyan
sharafaton se vasta na shahr men na gaanv men
vatan men luuT ho rahi taraqqiyon ke naam par
numud-e-sub.h-e-irtiqa na shahr men na gaanv men
hon mun.aqid qadam-qadam mohabbaton ki mahfilen
hua hai aisa faisla na shahr men na gaanv men
Leave a Reply