Dar Khula Subh Ko Pau Phatte Hi Mai-Khane Ka

dar khula subh ko pau phatte hi mai-khane ka

aks suraj hai chhalakte hue paimane ka

husn maujon ka chhalakna bhare paimane ka

raqs pariyon ka hai aalam hai pari-khane ka

haae zanjir-shikan vo kashish-e-fasl-e-bahar

aur zindan se nikalna tire divane ka

sadqe us soz ke jo soz ho us husn ke saath

shoala goya par-e-parvaz hai parvane ka

hon vahan gham hai jahan hasti-e-mauhum miri

dusra naam adam hai mire virane ka

na bayan ho jo mile subh-e-azal sham-e-abad

hashr hai beach ka tukda mire afsane ka

parda bhi baat bhi jalva bhi pas-e-daman-e-barq

shokhiyan hain ki ye andaz hai sharmane ka

baal ke badle nazar aate hain is men sau chaak

aks aina-e-dil par bhi pada shane ka

pet men khum ke hai jo kuchh vo bhara hai is men

munh na khulva are vaaiz mire paimane ka

kya tasavvur hi se uth jaate hain parde dil ke

dil bhi kya naam hai un ke kisi kashane ka

rakhti hai alam-e-nau sorish-e-hangama-e-ishq

hashr ik harf-e-ghalat hai mire afsane ka

aap ke haar ki kaliyon se ye milne ka nahin

dil hai mitti ka na ghulne ka na murjhane ka

khinchne vaali ki jhalak dekhi hai jab se saaqi

dekhna munh mujhe angur ke har daane ka

phirti hai hashr ke din aankh ke niche shab-e-vasl

haae andaz vo us zulf ke bal khane ka

sham-e-kaaba rahe mahfuz ilahi ta-hashr

naam raushan hai ik ujde hue but-khane ka

na hava thi na miri ah-e-adu the vo the

haal shab ko na khula shama ke bujh jaane ka

log kahte hain ki hai zahid-e-martaz ‘riyaz’

rind kahte hain use chor hai mai-khane ka

Leave a Comment