Ajay Sahaab
vo jo phuul the tiri yaad ke tah-e-dast-e-ḳhar chale gae
tire shahr men bhi sukun hai tire be-qarar chale gae
na vo ashk ab na vo aable na vo chiḳhti hui dhaḌkanen
miri zaat se tire dard ke sabhi ishtihar chale gae
na vo yaad hai na vo hijr hai na nigah-e-naz ka zikr hai
mire zehn se tiri fikr ke sabhi rozgar chale gae
the vo fitratan hi shahid-ḳhu unhen qatilon se bhi pyaar tha
kabhi maqtalon men kaTe the vo kabhi su-e-dar chale gae
na badan bacha na lahu bacha na to jism ka koi mu bacha
koi ja ke kah de ye dard se vo tire shikar chale gae
yuun abas kisi ko sada na do dil-e-zar ko ye bata bhi do
kabhi ab na aenge lauT kar vo jo ek baar chale gae
unhen kya lalak tire faiz ki unhen kya talab tire vasl ki
jo mizaj le ke faqir ka sar-e-ku-e-yar chale gae
hai ye sach ki mausam-e-hijr men mira ḳhaar ḳhaar badan hua
kabhi yaad tujh ko jo kar liya to badan ke ḳhaar chale gae
na ḳhushi men ab vo surur hai na to dard men vo nasha raha
lo ‘sahab’ bada-e-ishq ke vo sabhi ḳhumar chale gae
Leave a Reply