lab pe aai hui ye jaan phire
yaar gar is taraf ko aan phire
chain kya ho hamen jab aath pahar
apne ankhon men vo javan phire
khun-e-ashiq chhuta ki hai lazim
tere talvar par ye saan phire
saqiya aaj jam-e-sahba par
kyuun na lahrati apni jaan phire
hichkiyan li hai is tarah bat-e-mai
jis tarah gatkari men taan phire
ya to vo ahd the ki ham hargiz
na phirenge agar jahan phire
aae ab roke ho maaz-allah
aap se shakhs ki zaban phire
ruuth kar uth chale the ‘insha’ se
baare phir ho ke mehrban phire
Leave a Reply