Maikash Badayuni
ashiyan par karam-e-barq-e-tapan hai ab bhi
dekho gulshan ki fazaon men dhuan hai ab bhi
ham-safiran-e-chaman tum ko mubarak ho bahar
ham asiron ke muqaddar men ḳhizan hai ab bhi
daur hai sang-e-havadis ka magar kya kahiye
dil men ik kar-gah-e-shisha-garan hai ab bhi
ab na vo dil hai na vo dil ki tamanna lekin
chashm-e-janan miri janib nigaran hai ab bhi
ham ne kyuun ek tabassum ki tamanna ki thi
aankh us jurm pe ḳhunaba-fashan hai ab bhi
rahnuma.i ka ye jaadu koi dekhe ‘maikash’
gard-e-rah par hamen manzil ka guman hai ab bhi
Leave a Reply